TUFWATILIE VIBALI VYA UJENZI – ANNA Msola

Posted on: December 18th, 2024

Mwenyekiti wa Kamati ya Fedha, Uongozi na Mipango Mhe. Anna Msola amewaagiza wataalamu kutoka idara ya Ardhi kuongeza  kasi  ya kufuatilia majengo  yote yanayojengwa  kama yanavibali vya ujenzi, kwani kufanya hivyo itaondoa ujenzi holela wa makazi lakini kubwa zaidi halmashauri itakusanya mapato.

“watu wa ardhi tukipita maeneo mbalimbali  ya wilaya yetu tunaona watu wanavyojenga majumba kwa kasi, lakini cha kushangaza wengi wao  hawana vibali vya ujenzi hivyo nawamba anzisheni operesheni maalumu  ya kukagua majengo yote yanayojengwa mhakikishe kama yana vibali na hii itatuongezea mapato lakini pia watu watajenga  kwa kufuata  ramani na hivyo kuupendezesha mji wetu.” Alisema Anna Msola

Aidha kwa upande wa wajumbe wa kamati hio wao walisisitizia swala zima la upungufu wa madawati na viti mashuleni  na kushauri mikakati yote iliyopendekezwa na kupitishwa ili kuondokana na tatizo hilo  ianze kutekelezwa mara moja ili ifikapo Januari  watoto wote mashuleni wakae kwenye madawati na kwa nafasi.

Wakati huohuo  Mkurugenzi wa Halmashauri ya Wilaya ya Kilolo Ndugu Hassan Mnyikah aliishukuru kamati hio kwa maono na ushauri wao mzuri walioutoa  na kuahidi  kuufanyia kazi kwa vitendo  ili kuhakikisha  maendeleo ya halmshauri na ukusanyaji wa mapato unazidi kushamiri.

Kikao hicho kilifanyika katika ukumbi wa halmashauri ya wilaya ya kilolo tarehe 18-12-2024.