WILAYA YA KILOLO KUFANYA MAONYESHO MAKUBWA YA BIASHARA, KILIMO NA VIWANDA

Posted on: April 16th, 2025

Mkuu wa Wilaya ya Kilolo Mhe.Rebecca Sanga Nsemwa ambaye pia ndie Mwenyekiti wa baraza la biashara, ameutangazia umma kuhusana  na ujio wa  maonyesho makubwa ya biashara, viwanda na kilimo yatakayofanyika  tarehe 21-05-2025 katika viwanja vya Chuo cha Maendeleo FDC kilichopo mji mdogo wa Ilula.

Maonyesho hayo yameandaliwa na Chemba ya Biashara, Viwanda na Kilimo TCCIA, yakilenga kuwapatia nafasi wawekezaji, wafanyabiashara na wafugaji kuziona na kuzitambua fursa zilizopo Wilayani Kilolo ili wapate kuongeza na kutanua wigo wa uzalishaji, uwekezaji pamoja na masoko yao kiujumla.

Akizungumza  katika kikao hicho cha Majadiliano ya Maonyesho hayo Rebecca  Nsemwa amewaalika Wananchi wa Mkoa wa Iringa  na maeneo ya jirani kuja kushiriki kikamilifu katika maonyesho hayo kwani yanatija kubwa sana kwa makundi mbalimbali yatakayoshiriki.

“Maonyesho hayo ni muhimu sana katika kukuza uchumi wetu wa wananchi wa Wilaya ya Kilolo na Mkoa wa Iringa kiujumla, kwani maonyesho yatajumuisha makampuni mbalimbali yatakayo onyesha  jinsi ya kuongeza thamani  katika mazao yetu pia wadau mbalimbali wa usindikaji na uwekezaji watashiriki.”  

Aidha kwa upande wake Mwenyekiti wa Chemba ya Biashara, Viwanda  na kilimo TCCIA Wilaya ya Kilolo, Charles Chavala ameeleza kuwa wamejipanga  ipasavyo kufanikisha  kwa ufanisi mkubwa maonyesho hayo, huku wakiamini kuwa wakazi wa  wilaya ya kilolo watanufaika na maonyesho hayo kwa sekta zote zikiwemo  kilimo, biashara ufugaji, viwanda n.k.